NG Doornpoort

'n Nuwe tuiste vir al God se kinders

Ten diepste is 'n visie 'n blik op God self, en wat Hy kan en wil doen. Na aanleiding van Hebr. 11:27 is dit om die onsienlike God se werk onder ons te sien en om met Hom saam te werk in die uitvoering daarvan. 'n Gemeentevisie verskaf sowel die bestaansrede vir 'n gemeente, as die doel wat dit moet najaag. Alles wat 'n gemeente aanpak moet dus daaraan gemeet word.

As gemeente het ons in 2000 die visie van die Here ontvang om 'n nuwe tuiste vir al God se kinders te wees. Elke woord van die visie is van belang vir die verstaan van die gemeente se identiteit.

'n Nuwe – die gemeente is 'n vernuwende gemeente wat 'n kontemporêre kultuur omarm
Tuiste – die gemeente is 'n veilige ruimte waar alle mense welkom is in God se teenwoordigheid
Vir Al – die gemeente heet almal welkom wat 'n versugting na God het
God se kinders – Nie alleen is ons kinders ons besondere bedieningsfokus nie, maar streef almal van ons om soos kinders nederig voor God te leef

Die gemeente probeer daarom nie alles denkbaar te doen wat 'n gemeente kan doen nie. Vanuit ons visie fokus ons sterk op die 32.5% van ons familie wat jonger as 18 jaar is. Van die 1155 gemeentes in die NGK het minder as 1% meer kinders as persentasie van hulle sieletal as ons! Dit is interessant dat die persentasie van die gemeente jonger as 18 jaar die afgelope 5 jaar konstant gebly het (32.9% in 2002 en 32.5% in 2007), maar dat die ouderdomsverspreiding onder die jeug dramaties verander het. Daar is nou aansienlik minder voorskoolse kinders.