NG Doornpoort_GemeenteStruktuur

Die gemeente se bestuur bestaan uit ’n Sentrale Kerkraad (SKR), Uitvoerende Kerkraad (UKR) en verskeie kommissies.

Ingevolge die Kerkorde van die NG Kerk (1998) is die opsig oor, die regering van, en tug in die gemeente aan die SKR toevertrou. Alle bevoegdhede berus by die SKR en dit is die hoogste gesagsliggaam van die gemeente, behalwe vir sekere besluite wat aan die UKR toevertrou is.

Die SKR het die verantwoordelikheid om toe te sien die gemeente se missie/visie/kort- en lang termyn plan uitgevoer word. Hieronder resorteer ook die finansiële beleid wat gevolg word. Die SKR het dus ook die verantwoordelikheid en die aanspreeklikheid oor die aanwending en bestuur van die gemeente se finansies. Die verantwoordelikheid om sekere take in die verband te verrig mag gedelegeer word indien so besluit word deur die SKR – die aanspreeklikheid daarvoor kan nie gedelegeer word nie en bly dus by die SKR.

Die SKR moet die toestemming van die UKR verkry om:

·	verteenwoordiging van blokke op die Communitas Kerkraad, te verander;

·	die grense van 'n blok te verander;

·	die visie, missie en kernwaardes van die gemeente verander;

·	predikantsposte te vermeerder of verminder;

·	leraars tussen blokke te skuif;

·	vaste eiendom te koop/verkoop; en

·	langtermyn finansïele verpligtinge aan te gaan.

Die SKR bestaan uit: die Leierouderling (Voorsitter), Leierdiaken, Kommissievoorsitters, Gemeenteverteenwoordigers, al die Leraars en die Saakgelastigde. Die SKR rig en koördineer die bedieninge van die gemeente in gehoorsaamheid aan die Here. Die SKR vergader een maal per kwartaal soos aangedui op die kalender.

Die UKR bestaan uit: alle lede van die SKR en die Communitas Kerkraad. Die UKR vergader een maal per kwartaal soos aangedui op die kalender.

Die Communitas Kerkraad: is alle diakens en ouderlinge, behalwe dié wat spesifiek verkies is tot die SKR. Die Communitas Kerkraad vergader een maal per kwartaal soos aangedui op die kalender. Vir meer inligting oor die Communitas Kerkraad sien “Bedieninge - Communitas Kerkraad”.

Kommissies: Op hulle beurt koördineer die kommissies die verskillende bedieninge van die gemeente. Die verskillende kommissies vergader een maal per kwartaal soos aangedui op die kalender. Alle lidmate wat geroepe voel om die Here met hulle besondere gawes te dien, is welkom om op enige kommissie te dien of by enige bediening in te skakel. Vir meer inligting sien “Kommissies” asook “Bedieninge”.