Paasnaweek-Program

Donderdag 19:00 – Vissie en Broodjie Ete
 
Vrydag – “Wees stil en weet Ek is die Heer” –  Elkeen en elke gesin tuis of waar julle ookal kan.
 
Saterdag – Swart Saterdag – Ons het die kapél voorberei sodat daar ‘n atmosfeer is waar jy kan kom stil word en onthou dat die HERE van die heelal sy lewe vir jou gegee het en in ‘n graf gelê het.  Die kerk sal oop wees van 07:00 af tot 12:00
 
Sondag  –     06:00  Gesamentlike ontbyt…  Ons bring elkeen vir ons stoele en ‘n piekniekmandjie met ‘n heerlike ,(of as jy moet, ‘n gesonde) ontbyt.  Ons kuier buite die kerk onder die bome en kyk hoe die son opkom.  Daarmee onthou ons die OPSTANDING van Jesus wat vroeg die Sondagoggend plaasgevind het.
07:00  –  OPSTANDINGSFEES  Ons vier dan saam die opstanding van Jesus met ons Erediens.
 
Neem tog kennis van die tyd van die erediens.  Dit is 07:00 en nie 09:00 soos gewoonlik nie!


AsWoensdag 2019

Op 6 Maart 2019 vier die Christelike kerk Aswoensdag.  Aswoensdag is die begin van die lydenstyd op die Christelike kalender.  Dit beteken dat die Christelike kerk dan begin fokus op die lyding van Jesus tot en met goeie Vrydag, wat vanjaar op 19 April plaasvind.

Op Aswoensdag ontvang ons ‘n simboliese kruis as teken dat ons Jesus se lyding verstaan as sy medelye en eenwording met ons as mense.  Op dié dag doen almal instropeksie, sodat die betekenis van sy lyding helder uitstaan in ons lewe.

Woensdag 6 Maart om 10:00 die oggend en weer  om 19:00 die aand  is die Aswoensdagdiens in die Aanbiddingsruimte.  Ons beplan ‘n Adoramus-diens met musiek en stilte en Woord en gebed.  Jy is baie welkom.



Hardloop!!!!

Die feit dat die Romantiese Musiekaand met kaas en wyn uitgestel is, beteken nou nie jy gaan die hardloop vryspring nie!  (Jy sien hard-loop pas bymekaar!  Om so baie te loop sonder dat iemand jou jaag is hard!) Pret-draf is belaglik! Ha ha ha ha ha….
Nee ou maat!  Saterdag-oggend 7 uur klap die skoot en dan hardloop julle (Net nie ek nie want ek moet die pannekoek en die brekkie-buns en die koffie en die koeldrank oppas!)
Inskrywings gebeur van 06:00 af en dan kan jy al koffie drink en pannekoek eet.  Dan staan jy bietjie rond tot 07:00 en terwyl jy rondstaan drink jy koffie en jy eet jou eerste brekkie-bun.   Dan koop jy jou tweede brekkie-bun vir die pad en na die wegspring loop en eet jy jou brekkie-bun (of 2 pannekoeke) op die pad.  Moet asb net nie die papiere langs die pad weggoi nie… soek ‘n asblik
Die ouens wat nou nie gaan hardloop nie kry hopelik nou ook die idee dat julle baie welkom is om vroeg hier by die kerk te kom brekfis eet.  Jy hoef nie eers hardloopskoene aan te trek nie!  Sien julle!!


Romantiese Musiekaand Uitgestel…

Aggenee… Ons kon nog nie genoeg kaartjies verkoop kry vir Saterdag nie, en het besluit ons stel dit uit na ‘n volgende datum.  As ons vir die klompie mense wat reeds kaartjies gekoop het die geleentheid laat aangaan gaan ons teen ‘n verlies werk en dit sal op hierdie stadium bietjie van ‘n ramp wees.  Maar moenie stres kap nie. Iewers vorentoe doen ons dit dit GROOT.
Ons wil julle nou nie onder druk plaas en julle verplig of dit op julle probeer afdwing nie maar as jy voel jy moet jou kaartjie se geld terugvat kan jy Sondag met Nicolene in die kantoor gaan praat.  Sy sal vir jou die 234 vorms gee wat jy in triplikaat moet invul en dan sal ons al die aansoeke verwerk en na so 3 jaar vir jou terugvoer gee per poskantoorpos en dan kan ons besluit oor ‘n datum waarop ons die geeld aan jou sal begin terugbetaal….  Nee ek speel!! Julle kan die geld Sondag by Nicolene kry.


Romantiese Musiekaand en Barnyard-ete

Saterdagaand 2 Maart hou ons ‘n Romantiese-Musiek-en-Kaas-en-Wyn- aand.  Ons het pragtige jong sangers wat romantiese liedere gaan sing en ons gaan lekker kuier. Daar sal kaas en wyn en allerlei beskuitjies en ander eetgoedjies op die tafels wees.  Die eintlike ete kom egter uit elkeen se eie piekniekmandjie wat jy saambring… soos by ‘n “Barnyard”.  Jy mag jou mandjie se inhoud ook met ander deel sodat jy ook van hulle lekker kos kan afrokkel!
Die Romantiese kaas en wyn -aand begin 18:30 in die kerksaal.  Die kerkgebou is geleë in Doornpoort by Baobab Straat 841.
Kaartjies is beskikbaar by die kerkkantoor.  Skakel vir Nicolene by 012 547 1456. Die kaartjies kos R90 per persoon. En Maak asb gou want ons moet teen Woensdag weet vir hoeveel mense ons moet regmaak!


PRETDRAFFIE!

Doornpoort Gemeente het Saterdag 2 Maart 2019 ‘n heerlike besige dag! 

Ons begin die oggend 07:00 met ‘n pretdraf.  Daar is ‘n 5 km afstand waarvoor die inskrywings R40 per persoon is en dan ook ‘n 10 km afstand waarvoor jou inskrywing R50 per persoon sal kos.  Mense kan van 06:00 reeds kom inskryf.  Daar sal koffie en pannekoek en “brekkie-buns” te koop wees voor en na die pretdraf.  Bring jou buurman saam dan hardloop jy vir hom weg dan dink jou vrou jy is koel!
Die pretdraf se begin- en eindpunt is by die kerkgebou in Baobab Straat 841, Doornpoort.


Aand van Kaas en romantiese Musiek en Wyn

Wanneer?    Saterdagaand 2 Maart 2019. om 18:30
‘n Heerlike aand van kuier en luister na romantiese songs, en, o ja… ook lekker eet.  Ons gaan KAAS en WYN en “snacks” doen en dan gaan ons in ‘n tipiese “Barn Yard”styl ons eie piekniekmandjie eet…. ek bedoel die kos in die mandjie…he he he he … 
Ons het ‘n hele aantal kunstenaars wat mooi romantiese liefdesliedere gaan sing om ‘n lekker atmosfeer te skep.  Ons sal tafels hê met kaas en snacks en wyn.  Jy mag asb ook jou eie wyn bring want dalk sit jy nie jou mond aan die wyn wat ons gaan dek nie. 
Wat moet jy saambring? Jou Piekniekmandjie met die kos vir almal wat jy saam met jou bring.  Jou eie eetgerei en wynglase. As jy jou eie smart wyn verkies bring jy dit saam.   En  jou geliefde! 
 
Wat kos dit?  Dit gaan jou R90 per persoon uit die sak jaag.  Dit sluit die vermaak en die kaas en ‘snacks’ en wyn in.  Die saamwees en koinonia is verniet… al is dit die items met die hoogste waarde…
 
Kontak asb vir Nicolene as jy kaartjies wil hê:  Kantoor 012 547 1456


Pretdraf/Fun Run

Dis vir my een van die beste oksimorons wat mense uitgedink het: PRET-DRAF, of in Engels FUN-RUN. Wat se pret is daar nou in draf? Dit klink vir my meer na inspanning en harde werk!  Maar nou ja… dis maar net my mening.  Daar is ‘n hele wêreld van mense wat anders dink as ek.  Soos jy wat hier lees byvoorbeeld.  Ek weet jy is lus vir ‘n 5 km stappie of draffie of vir ‘n 10 km en ons nooi jou uit om Saterdag 2 Maart te kom deelneem aan ons pretdraf hier by Doornpoort Gemeente. Kom skryf in van so 06:00 af.  Ons (ek bedoel julle) spring weg om 07:00.  Elke deelnemer wat die roete voltooi kry ‘n medalje.  Die 5 km se inskrywingsfooi is R40 en die 10 km sal jou R50 kos.
Daar sal van vroeg af, en na die wedloop, koffie en koeldrank en pannekoek en Brecky-Buns te koop wees. 
Kom daag jou vriende (én vyande) uit en hardloop vir hulle weg en dan kom kuier ons lekker saam… dit kan ek ten minste goed doen!
Pieter Viljoen


Simple Church “Kick-off”

Sondagaand om 18:00 skop “SimpleChurch” af. 
Dit is bedoel vir tieners van gr 7 tot gr 11 (belydenisklas) asook vir matrieks en  jongmense van alle ouderdomme tussen 18 en 80.  Die aanbidding en lofprysing gee ruim geleentheid om vreesloos voluit te gaan vir die lof aan die  Here en die boodskappe is ware pitkos vir die siel.
Ouers met tieners word spesiaal uitgenooi om Sondagaand op te daag met hulle kids en om hulle te kom inskryf vir die kategese van 2019.  Alles sal mooi verduidelik word aangaande hierdie jaar se programme.
 Ons sien julle daar!


Kinderkerk

Die kinderkerk begin weer Sondag!
Die kindertjies kom 09:00 bymekaar bo in die kinderkerk en neem lekker deel aan die program.
10:00 ontmoet die ouers die personeel van die kinderkerk in die teetuin en dan skryf julle die kindertjies in vir die kinderkerk vir 2019.  Ons sien baie uit om julle te ontmoet en om julle kindertjies te begelei hierdie jaar!